نخب الصحراء – خبيرة سخونة
في لحظة كان المفروض تكون عنوان للفرح الوطني، واحتفالًا بالذكرى الخمسينية، تحوّل مشهد من غذا رسمي لساحة تصفية الحسابات بين منتخب منتخباه الساكنة وشيخٍ ممثل للقبيلة. المناسبة؟ “ غذاء بروتوكولي” فاخر نظمتو الولاية، حضروه ناس كيسموهم الفلاسفة بـ”الطبقة المخملية ”، وكاين لي كيسميهم قشدة المجتمع .. مهم ناس خاترين ( باش الله اعلم ) مهم هد العشا لي اصلا مديرو من المال العام تحول لروينة ولمعركة هضراوية طاحنة شبيهة بمعارك صحاب لبرارد فالسوق !
القصة بدات ملي نقز المنتخب وبغا يستفز الشيخ بشي كليمات لي قاصحين، ولكن الشيخ تاهو مساهلش، ومخلاش هضرة دوز، وناض و جاوبو جاوبه تاهو بالقصف، مهم ترونا الغدا بسيدي الهضري، ولا الكلام غا كيطاير وعافية الغضب غدا و كتزيد. حتى دخلو شي ناس تاهوما كانو فداك الغذا الفاخر معروضين حيث كينتمو تاهوما لزبدة المجتمع، مهم دخلو وفكو القضية ( واش فكوها خايفين العشا لي مخلص من المال العام يضيع ولا فكوها حيث خافو على الحفل ؟؟ ) ، ولكن جاو شي وحدين للجريدة و گالو لينا بلي الكواليس ديال هذ روينة، واه اصلا تصفية حسابات قديمة عندها علاقة بشي بقعة كان شراها الشيخ وحرجرو عليها المنتخب لمدة 15 سنة غير الشيخ كان صابر و حاط هذ الملف فالثلاجة كيتسنى غير الوقت لي يفرگع فيه الرمانة.
وفي الوقت اللي الحاضرين ( حاضرين فالغدا وغايبين على مستوى التدبير ، مهم ماشي كولشي ولكن غير شوية منهم ) گالو بلي شي وحدين خلاوها تشعل حيث عارفين سبب الخلاف لي اصلا كيف گلنا كان غير مجمد، ولكن شي وحدين ناضو و دخلو خافو لكيعا سيد الوالي عليهم وخافو ايضا يسد عليهم باب الحفالات المخملية الوجبات الممولة من المالية العمومية ولي كيشرف عليها طاقم تاهو ممول من محسوبية و زبونية، حيث تيرتورات ديال شباب ديالنا راهوما غا كينشو على طباسلهم الدبان مكاين لي حاس بيهم و فيهم گاع لي كعا وبدل طباسل بكوير و خدم فيه وهنا راسو.
المهم باش نكملو حنا هد الروينة، الغد ليه لي هو اليوم ناض الشيخ وقصد المحكمة حيث متسرطاتش ليه الواقعة ومتصرطاش ليه هضرت المنتخب ( أشگال ليهم الله اعلم )، مهم شيخ اليوم قصد مباشرة المحكمة و بضبط بيرو وكيل الملك، وقدم شكاية فيها اتهامات بـ”السبّ والقذف”، وربما حتى “تحرام العشا” لو كان القانون يسمح 😂. الشكاية كانت صريحة وعامرة تفاصيل وفيها بزااف ديال تغراق وايضا تقدم بشكاية للسيد الوالي.
لكن مربط الفرس ماشي في الشكاية ولا فالصراع داكشي عااادي ( المصارن فالكرش و كيدايگو ) ، مربط فرص هنا هو الرسالة اللي خاص توصل للمنتخبين كاملين وحتى لمسؤولين .. راه ماشي فكل مناسبة وطنية خصنا ضروري نحولها لحلبة استعراض العضلات السياسية. راكم كتمثلو وجه الجهة وكتمثلو ساكنة الصحراء المغربية لي معروف عليها الكرم وحسن الإستقبال و الضيافة ، وكيخص يكون البروتوكول أكبر من ego ديال أي منتخب أو شيخ أو حتى مسؤول.
اليوم البلاد باغية صورة مشرفة، ماشي مشاهد صبيانية وسط أضواء الذكرى الخمسينية. واللي بغا يصفّي حساب، يديرها فالمكاتب ماشي فـ”الغداء المخملي” الممول من جيوب الناس لي بزاف منهم اصلا بايت بلا عشا اصلا.
