نخب الصحراء – تبرگيگ
مدينة العيون عرفات هذ العشية الموافق لـ 15 نونبر 2025، توافق بالإجماع من بين عدد من الهيئات الجمعوية والنقابية، من بعد ما دارو إجتماع فمقر الجمعية المغربية لحماية المستهلك مع ديك الخمسة ديال لعشية. هاد اللقاء خرج بقرار صياغة مراسلة رسمية موجّهة للسيد والي جهة العيون الساقية الحمراء، عامل إقليم العيون، باش يوضح ليهم فيها سبب هذ الإقصاء لي تعرّضو ليه فهاد اللقاء التشاوري لي كان حول “الجيل الجديد للتنمية الترابية المندمجة” لي دار فمقر الولاية نهار الخميس لي فات.
الهيئات لي تجمعن عبرت على استغرابها الكبير من هاد التهميش، خصوصا وأن هذ اللقاء التشاوري جا فإطار الدينامية الملكية اللي كتأكد على ضرورة الانفتاح على مختلف الفاعلين وإشراكهم فهذ النقاش العمومي ودشي كاااامل باش حتى هوما يساهمو فبلورة رؤية تنموية جديدة ومندمجة داخل الأقاليم الجنوبية.
هذ الجمعيات والهيئات أكدت أن إبعادهم من هاد الاستشارة العمومية كيضرب فجوهر المشاركة المواطِنة، ومكيخدمش المصلحة العامة نهائيا، خاصة وأن هاد التنظيمات عندها تجربة ميدانية وملاحظات ممكن تفيد مسار التنمية فالعيون.
هاد المراسلة، لي من ناويين يوجهوها نهار الإثنين للسيد الوالي، غادي تطالب بتوضيحات دقيقة حول الأسباب ديال هاد الإقصاء، مع التأكيد على أهمية احترام مبادئ الشفافية والتشاركية فكل اللقاءات المستقبلية، لضمان تمثيلية موسعة لجميع القوى الحية فالمدينة.
وفالختام هذ الاجتماع كيجي للتأكيد على استمرار التنسيق بين هاد الهيئات، والتشبث بالدفاع على حقها فالمشاركة الفعلية فكاع النقاشات العمومية المرتبطة بتنمية العيون والأقاليم الجنوبية عموما.
