نخب الصحراء – العيون
البارح حتضنات مكتبة محمد السادس الوسائطية الكبرى فمدينة العيون واحد الحفلة خاصة بالموظفين والمتقاعدين ديال البوليس ومعاهم حتى وولادهم، وزيد عليهم الأيتام، وهذشي جا تنفيذا لتعليمات المدير العام للأمن الوطني والمديرية العامة لمراقبة التراب الوطني.
هاد الموعد السنوي ترأسو الدكتور حسن أبو الذهب، والي أمن لعيون، فإطار تفعيل الرؤية الاجتماعية لي كتعتمدها الإدارة العامة ديال الأمن الوطني، واللي كتركّز على الاعتراف بالناس لي خدامين فهاد الجهاز الأمني البوليسي وتشجيع التفوّق والعطاء المهني والأخلاقي وسط عائلة الأمن.
وفهد الحفل البوليسي، تكرمو عدد من التلاميذ من ولاد العائلة الأمنية لي جابو نقاط طالعة فالباك فموسم ديال العام لي فات 2024/2025، اعترافا بمجهوداتهم وتشجيعا ليهم باش يكمّلو طريقهم مسارهم الدراسي فمستوى مجهد وعالي.
البوليس ديال العيون وفهذ المحطة أكّدو على أهمية هاد المبادرة، حيث كتبرز الدعم ديال المديرية العامة للأمن الوطني لولاد الموظفين، وكترسّخ روح الخدمة والجد داخل الوسط العائلي والمهني. وهاد الحفل كيعكس التزام الإدارة الأمنية البوليسية بدعم قيم التميز والإبداع، وتحفيز الموظفين ديالها باش يكونو متفوّقين فخدمتهم وفي حياتهم الدراسية.
وفهاد المناسبة، لي حضرو ليها مسؤولين ثقال ديال البوليس فالعيون وكانو فيها بزاف ديال الموظفين والموظفات، تكرّمو حتى المتقاعدين من أسرة الأمن الوطني لي سالاو الخدمة ديالهم بعد سنوات طويلة ديال التضحية والسرابس ونكران الذات، وتم الاعتراف ليهم بگاع داكشي لي قدموه واللي دارو باش المواطن يعيش هاني ومهمي فوسط مدينة وبلاد لي ديما فيها الأمن والأمان والإستقرار .
الحفل كان بحال شي لوحة فنية زوينة، رسماتها المديرية العامة للأمن الوطني والمديرية العامة لمراقبة التراب الوطني بكل حب واهتمام، وللي حقيقتاً كتجيد الرؤية الإنسانية لي كتعتمدها فتعاملها مع أسرة الأمن. وكان واحد تضامن و واحد الفرحة كبيرة لي ترسمات على المتقاعدين وعلى وجوه ولادهم ، واللي كتبين أن الأمن الوطني ماشي غير مؤسسة… ولكن راه هو واحد العائلة اللي كبيرة كتجمعها روابط المحبة والتضامن.
الناس لي كانو حاضرين أكدو بللي هذ الحفلة كانت ناجحة بكل تفاصيلها، وقدّمات نموذج رائع فالاحتفاء بالتميز والاجتهاد، حيث كانت الكلمات طالعة من القلب والابتسامات معمرين الوجوه… وفعلا كانت من أجمل اللحظات لي عاشوها البوليس و ولادهم.
ومن هذ المنبر مدير نشر موقع نخب الصحراء نايبة عليه وعلى گاع الصحفيين لي خدامين فصمت ورا هذ الجريدة، كيقدم خالص التهاني لگاع ولاد البوليس لي حمرو وجهنا و وجه عائلاتهم، وكنحيو كذلك گاع البوليس المتقاعدين لي فعلا لعبو دور كبير فهدشي لي وصلات ليه البلاد اليوم من أمن و إستقرار، ومنساوش البوليس لي خدامين ولي هوما كيسهرو باش حنا نعسوا و نرتاحو، كنگولو ليهم الله يحفظكم لينا وكذلك كنحيو الحموشي على گاع المجهودات والمبادرات لي كيديرها، وفلخر اللهم ينصركم والله ينصر سيدنا ويحفظو لينا.
