نخب الصحراء – الداخلة
هذ الصباح، استقبل والي جهة الداخلة الدكتور علي الخليل ومعاه الشاب المهندس الراغب حرمة الله رئيس جماعة الداخلة، السيد توماش أورلوفسكي سفير جمهورية بولونيا فالمغرب، والسيد أندجي شيدوو قنصل بولونيا، فلقاء رسمي بمدينة الداخلة.
وفهاد الاستقبال، تناقشو من بينهم فيزاف ديال المجالات لي ممكن يخلقو فيها تعاون مشترك، وايضا باش يعززو العلاقات ويخلقو جسر تواصل اقتصادي بين البلدين، خصوصاً فظل هذ القفزة التنموية لي عرفتها جهة الداخلة ولي كان فيها المهندس الراغب رقم صعب فالمعادلة التنموية واللي حرگ فيها الصباط ووقف على كل كبيرة و صغيرة باش الداخلة اليوم تولي مدينة بحالها بحال گاع المدن الحداثية.
وهاد اللقاء كان ايضا فرصة باش يتدارسو المؤهلات الاقتصادية والاستراتيجية لي كتميز مدينة الداخلة، وزيد عليهم الدور المهم ديال المؤسسات الترابية فتعزيز الانفتاح على الشركاء الأجانب وتقوية الحضور ديال الجهة فمجال التعاون الدولي.
وكيجي هاد الاستقبال فإطار الرغبة الملحة لمدينة الداخلة فترسيخ المكانة ديالها كفضاء مفتوح للتعاون الثنائي والمتعدد الأطراف، وكوجهة واعدة لاحتضان المبادرات الدبلوماسية والاقتصادية.
هاد اللقاء لي جمع اليوم المهندس الشاب الراغب حرمة الله بوالي الجهة وبشخصيات دولية وازنة، كيعكس الرضى الكبير لي كتعبر عليه المؤسسات فحق هاد الشاب لي قدر يعطي صورة مشرفة على الكفاءات المحلية الشابة، ويبان كواحد من الوجوه الجديدة لي كتساهم فتعزيز علاقات الجهة خارجياً. حضور الراغب حرمة الله فهاد المستوى كيبين بوضوح أن الشباب اليوم قادرين يلعبو دور مهم فالدبلوماسية الترابية، ويصنعو مسار سياسي وتنموي مبني على الكفاءة والطموح وخدمة المدينة.
