نخب الصحراء – خبار بالدريجة
البارح الخميس الجوندارم التابعين لسرية الدرك الملكي بسيدي إفني، جهوية كلميم، فشلوا عملية تهريب الأطنان ديال الحشيش كانت محملة فوحد الكاميو اللي كان جاي من مدن الشمال في اتجاه الصحراء نيشان.
وحسب شي تبرگيگ وصل لصحيفة نخب الصحراء، هذ العملية، اللي نفذتها عناصر الجوندارم كانت فالعشرة ديالي الليل وبالضبط فبراج الجوندارم فالطريق الجديدة تزنيت-الداخلة، التابعة لنفوذ جماعة لخصاص، هذ العملية البطولية خلاتهم يشدو 190 رزمة تقريباً كتوزن 6,5 (ستا طن ونص ) ديال الحشيش، وزيد عليها واحد الفلوكة وجوج ماطر ديال الما مجهدين.
وفهذ العملية شدو الشيفور لي كان سايگ الكاميو، وهو شاب فعمرو 30 سنة، ونزلوه للحراسة النظرية وهدشي بأوامر من النيابة العامة المختصة، باش يحققو معاه ويعرفو گاع الناس لي متورطين معاه فهد العملية لي كتعتبر نوعية نظراً للكمية الهائلة ديال الحشيش لي كانت موجهة لمدن الصحراء، واللي شاكين على أنها عملية تهريب دولية نحو جزر الكناري الإسبانية.
وهذ العمل البطولي لي داروه جوندارم سيدي افني البارح، كيجي فإطار المجهودات اللي كديرها القيادة الإقليمية للدرك الملكي بسيدي إفني بتنسيق مع جهوية كلميم، باش ميخلو حتى شي حد يتجاوز الحدود فجميع المجالات الإجرامية اللي من بينها التهريب الدولي للحشيش وحتى الحراگة.
عذراً التعليقات مغلقة