نخب الصحراء – بالدريجة
فالوقت اللي كيتسناو فيه شباب بوجدور فرص حقيقية مبنية على الكفاءة والاستحقاق، خرجات معطيات شعلات النقاش العمومي حول مباراة توظيف متصرفين بوزارة الاستثمار والتقائية وتقييم السياسات العمومية، بعدما خرجات معطيات كتفيد إمكانية استفادة مستشار جماعي معروف بالإقليم من “دعم سياسي صامت”، قبل حتى ما تخرج النتائج النهائية للمباراة.
اللي زاد صب الزيت على العافية هو أن المعني بالأمر كينتمي لنفس اللون السياسي ديال النائب البرلماني عن دائرة بوجدور، الشي اللي خلا بزاف ديال المتتبعين يطرحو سؤال كبير ~ واش فعلاً الكفاءة هي اللي غادي تحسم النتيجة، ولا أن بعض الخيوط كتتحرك فالكواليس بعيداً عن أعين الرأي العام؟
فمدينة صغيرة بحال بوجدور، الأخبار كتجري أسرع من الريح، وأي لقاء أو تقارب بين أصحاب القرار كيتحول مباشرة لموضوع نقاش فالشارع والمقاهي ووسائل التواصل الاجتماعي… وهاد المرة، الحديث على لقاء سابق جمع وزير الاستثمار بالنائب البرلماني خلال زيارة للأقاليم الجنوبية وهدشي لي زاد من منسوب الشكوك، وخلا كثيرين يتساءلو واش حظوظ بعض المترشحين متساوية فعلاً، ولا أن و”المعرفة والسياسية” مازال عندهم وزن أكبر من الشهادات والخبرة.
المشكل ماشي فكون مستشار جماعي ترشح للمباراة، فهذا حق قانوني مكفول ليه بحال أي مواطن مغربي. المشكل الحقيقي كيبدا ملي كيتسرب الإحساس بأن بعض الأسماء داخلة للمنافسة وهي محاطة بمظلة سياسية قادرة ترجح الكفة قبل ما يتحط أول تنقيط أو تتفتح أول ورقة تقييم.
هاد النوع ديال الملفات كيرجع اليوم للواجهة واحد السؤال لي كيضر بزاااف واللي كيتكرر مع كل مباراة توظيف، واش فعلاً ولاد الشعب كاملين واقفين على نفس خط الانطلاق؟ ولا كاين اللي كيبدا السباق من قدام والباقي غير كيجري وراه؟
الشارع البوجدوري اليوم محتاج يعرف واش منطق المؤسسات هو اللي غادي ينتصر، ولا منطق الولاءات والاصطفافات السياسية. لأن أخطر حاجة ماشي نجاح مترشح أو سقوط آخر، أخطر حاجة هي ملي المواطن كيفقد الثقة فالمؤسسات وحتى فالسياسيين والسياسة لي ولاو كيخدموها غير باش يقدو مصالحهم ومصالح ناس ديالهم لي مشاركين معاهم فلوزيعة الريعية.
واليوم، الأنظار كلها متجهة للجهة المنظمة للمباراة، باش تقدم جواب عملي ماشي بالكلام، عبر إعلان النتائج وفق معايير واضحة وشفافة، تقطع الطريق على كل الشكوك وتحافظ على مصداقية التوظيف العمومي.
أما الرأي العام فبوجدور، فباقي كيتسنى الحقيقة كاملة… لأن الناس ولات كتسول : واش بوجدور فعلاً كورة، ومدورينها غير بينا؟
عذراً التعليقات مغلقة