نخب الصحراء – خفيف وثقيل
فظل هد الزخم والتنمية لي عرفتوا الأقاليم الجنوبية ولي كيرجع الفضل ديالها للقائد الأول صاحب الجلالة الملك محمد السادس نصره الله، ولي كانت عندو رؤية سديدة وطلق النموذج التنموي للأقاليم الجنوبية فعام 2015, ولكن فمقابل الرؤية الملكية وفالجيهة لي مظلمة كاين اصحاب الرؤية العمياء لي مقضروش يسايرو الحنكة التدبيرية ديال سيدنا، ماشي حيث معندهمش الإمكيانيات ( الصحراء شبعانة خيرات ولله الحمد ) ولكن حيث معندهمش الإرادة ومعندهمش القناعة … كاملين ولاو متشبتين بالكراسي السياسية، ها لي دوز فيها عشر سنين وها لي سكن فيه قرن وكاينين شي وحدين سطاج لخر ( ردو السياسة شجرة عائلية ودارو فيها تشعبات أسرية ، كاين لي دخل ولادو وكاين لأنسطالة مرتوا وكاين لي فرق مجلس بين أحفادو فإطار الإرث السياسي …. لدرجة فبعض الجماعات كتلقى الأبناء فالأغلبية وخوالهم فالمعارضة.
وبلاتي وخا نقزت السطر ولكن باقي مكملت، وكاينين شي وحدين هذو گاع الهربة ( كتلقاه رئيس جماعة وعضو فمجلس الجهة وبرلماني وعضو فالمجلس الإستشاري ورئيس مجموعة ترابية وعضو فالكونگرس الأمريكي ومستشار فالقمر … هذو أسيدي بكثرت ما كثرو عليهم مناصب تلفو وشدو لارض، لدرجة انا واحد الواقعة وقعات فوحد جماعة كتقتل بالضحك ( ناض رئيس فوحد جماعة قروية بغا يعطي كلمة لإفتتاح الدورة العادية وگال ليهم السادة نواب السادة الوزراء … تا بقاو الأعضاء كيضحكوا ودخل واحد صحح ليه ( عاد عاق عرف بلي هو صفة ديالو فالإجتماع هي رئيس الجماعة وماشي مستشار برلماني.
مهم كاين بزااااف ديال الممارسات لي مّيْعات المشهد السياسي وحتى الناس ملات منها وحتى المزاليط لي اخر وحدين مهتمين بالسياسة ولاو عايقين بهدشي لي واقع، وخلي الزبونية والمحسوبية وخلي تمرير الصفقات لشركاتهم و شركات أزواجهم… وخلي التوظيفات لي مبنية على القرابة العائلية ووو… اما جانب الرفاهية والثراء الفاحش، هذاك جانب أخر، ناس ولات كتشوف بعيد ( مبقاش حلم ديالها تسكن فحي رياض فرباط ولا لمعارف فكازا … ناس اسيدي سقف طموحاتها التملكية تعلى بزاااف ولات عايشة فمستوى “البذخ المطلق” والبورجوازية الفاحشة المتوحشة ( تصحبهم بحالك انت لي لحلم ديالك تشري داسية عامرة )، لدرجة شي وحدين راه عندهم شقق فالبهاماس وجزر الكناري والكاربي،،، و واحد المنتخب جملة مفيدة ميعرف يگولها وعندو فيلا فاسبانيا كطل على الحرگة لي جاين من الداخلة ( فيلا منها لبحر).. مهم اللهم زد وبارك وعين الحساود فيها الشجرة العائلية اما العود كيف والو.
مهم لي بغينا نوصلوه راه هدشي ولا كيشوه الأجواء وكيميع الفضاءات، اليوم خص الكارطة تعاود تييك والوجوه لي راسها غطاه الشيب خصها تخوي وتفتح المجال للشباب لي عندو عقلية الجيل الخامس وكيعرف يتعامل مع الذكاء الإصطناعي، اليوم خص الفرص تعطى بمعناها الحقيقي وخص التغيير، وكيف گال جلالة الملك الله ينصرو لينا ( …من التدبير إلى التغيير …) واليوم هذا هو أنسب وقت لتنزيل خطاب سيدنا ، صافي باااااركة عليكم خمسين عام وانتومة كتعاودو لينا نفس الفلم نفس الوجوه نفس الخطاب… صافي اليوم الصحراء محتاجة لنفس كلوريكس الجديد، الصحراء محتاجة لشبابها لي أغلبهم فقذتوه الأمل لدرجة فظل يغامر ففلوكة ويقطع البحر على الشوارع لمزوقة بالخاوي، صافي باركة عليكم ولي عندو شي ارتباط بالكرسي مزال متعالج منو راه كاين فقهى ولاو تخصص فك سحر الإرتباط بالكراسي السياسية.
