نخب الصحراء – الداخلة
هذ الصباح، وفإطار الاحتفالات بالذكرى الخمسينية للمسيرة الخضراء لي جابت العزّ للصحراء المغربية، شهدات مدينة الداخلة، عروس الأقاليم الجنوبية، تنظيم ماراطون دولي على مسافة 10 كيلومتر.
السباق شارك فيه الصغير والكبير، رجال وعيالات، مغاربة وأجانب… فجو رياضي كان كثر من رائع، هذ المراطون كان من تنظيم جمعية وادي الذهب لألعاب القوى بإشراف الجامعة الملكية المغربية لألعاب القوى، وبتنسيق محكم مع ولاية الجهة ودعم كبير من المجالس المنتخبة لي دايماً واقفة وراء كل تظاهرة كتزيد تعزز مكانة المدينة وتبرزها فواجهة الأحداث الوطنية.
الحدث الرياضي الكبير ماشي كان غير محرد سيباق بل كان عرس وبكل المقاييس، عرف حضور شخصيات ثقيلة وعندها الكلمة فالميدان العمومي والسياسي، واللي ساهموا بشكل كبير فنهضة الداخلة وازدهارها.
من بين الحاضرين، كان والي الجهة لي معروف بخدمتو وحنكتو، والراغب حرمة الله رئيس مجلس البلدية، الشاب الطموح لي برهن اليوم أن مشاركة الشباب فالمجال السياسي كتعطي ثمارها.
وزيد عليهم سيدي صلوح الجماني، الرجل السياسي والمعروف فالأوساط الداخلاوية بأعمالو الاجتماعية، وزيد عليهم البرلماني مبارك حمية، المدافع الشرس على مصالح الداخلة فالقبة البرلمانية، وزيد عليهم المستشار والسياسي حرمة الله لي حتى هو بصم حضور قوي.
كل هاد الوجوه السياسية الخاترة كانت حاضرة فهذ التظاهرة لي كانت فنسختها الثانية، واللي حققات نجاح كبير وخلاّت كولشي كيهضر عليها وعلى مدينة الداخلة كمدينة ماشي سهلة.
من جهة أخرى، ما يمكنش نساو جنود الخفاء لي خدمو بصمت وسهرو الليالي باش ينجح هذ الحدث من بدايتو حتى لنهايتوا وفعلا بقاو حلفين عليه حتى نجحوه.
السباق عرف منافسة قوية، بحيث فصنف الذكور تُوِّج بطل كيني بالمرتبة الأولى، وتبّعو عداء مغربي لي كان قريب بزاف من اللقب.
أما فصنف الإناث، فازت عداءة مغربية بكل استحقاق، وأكدات مرة أخرى أن المرأة المغربية ديما رافعة الراية الوطنية فالمحافل الرياضية، ونزهة بدوان خير مثال على داك الروح الوطنية.
الجوائز كانت فالمستوى، ولي شجّعات بزاف من ديال الناس، باش يشاركو مستقبلاً فأنشطة رياضية بحال هادي، لي كتساهم فتنشيط المدينة وتعزيز مكانتها الرياضية.
وفالختام، هذ التظاهرة اليوم ما كانتش مجرد سباق، بل كانت رسالة قوية عامرة بالحب والإنتماء للوطن وللصحراء المغربية. الداخلة وبهاد الحدث برهنت أنها عاصمة رياضية حقيقية بجل الأقاليم بالصحراء المغربية، وكتزيد كل مرة تأكد أنها مدينة قادرة تجمع بين الرياضة والتنمية والروح الوطنية.
