نخب الصحراء – بلاغ ديوان سيدنا
بأمر من ملكنا العزيز والغالي جلالة الملك محمد السادس، الله ينصرو، تعقد اليوم لثنين 10 نونبر 2025 اجتماع فالديوان الملكي، حضرو فيه مستشارين ديال سيدنا لي هوما الطيب الفاسي الفهري، عمر عزيمان، وفؤاد عالي الهمة، ومعاهم زعماء الأحزاب الوطنية اللي كاينين فمجلس النواب وحتى المستشارين، وكان معاهم حتى وزير الداخلية ووزير الخارجية والتعاون الإفريقي والمغاربة المقيمين برا البلاد.
هاد الاجتماع جا تنفيذا لتعليمات سيدنا، وكان الهدف منو هو تحيين وتفصيل مبادرة الحكم الذاتي فإطار السيادة المغربية، تنفيذا لداكشي لي گال ملكنا فالخطاب نهار 31 أكتوبر اللي فات، ولي جا مباشرة من بعد القرار رقم 2797 اللي خرج من مجلس الأمن وكيدعم مبادرة الحكم الذاتي كحل واقعي للنزاع المفتعل فالصحراء.
سيدنا، الله يعزّو، ديما كيشدد على المقاربة التشاركية والتشاورية فالقضايا الكبيرة لكتخص البلاد، وهادشي علاش المستشارين ديالو بلغو الأحزاب أن الملك حريص على المشاورة معاهم فهاد الملف الحساس اللي كيعني جميع المغاربة. ودعاهم باش يقدموا تصوراتهم ومقترحاتهم لي ممكن تساهم فتفصيل وتنزيل مشروع الحكم الذاتي.
زعماء الأحزاب السياسية عبرو على افتخارهم بالتطورات الإيجابية لي عرفها ملف الصحراء المغربية، وفرحو بزاف بالمبادرة الملكية اللي كتشرك جميع القوى السياسية والمؤسسات الوطنية من أجل بلورة تصور شامل ومفصّل للحكم الذاتي، فإطار السيادة المغربية، اللي غادي يساهم فـلمّ شمل خوتنا اللي فمخيمات تندوف ويرجعهم لحياتهم الطبيعية وسط عائلتهم، ويبنيو مستقبلهم معانا فالمغرب لي جمعنا كاملين.
الأحزاب ايضا أكدوا حتى على تأييدهم الكامل للملك محمد السادس، وتجندهم الدائم وراء القيادة ديالو الحكيمة والمتبصرة، فالدفاع على الصحراء المغربية وترسيخ مغربيتها، خصوصاً بعدما مجلس الأمن اعترف بالمبادرة المغربية كـ”الحل الواقعي والقابل للتطبيق” باش يتسالى هاد النزاع المفتعل بمرة و ميبقاش مطول.
وفي تجاوب مع الدعوة ديال سيدنا الله ينصرو ، الزعماء السياسيين واعدو على أنهم يرفعوا مذكرات رسمية للملك فهاد الموضوع وفالقريب العاجل.
