نخب الصحراء – بالدريجة
فإطار سخونية الراس والتنقاز الخاوي لي معندو تا معنى، ناضو 4 الأشخاص فالعيون تصورو وهوما هازين السيوف والكاطورزات … مهم داكشي ديال زعما ( لي دوا يرعف )، هذ الفيديوا لي انتشار فبزاف ديال الصفحات واللي فنفس الوقت كيهدد سلامة وأمن ناس مدينة العيون.
البوليس ديال العيون وللي ديما فالصفوف الأمامية باش يبقى ديما السلم والسلام حاضرين فالعيون، ناضو مباشرة وتفاعلو مع الفيديوا المنشور و دخلوه للبحث واللي من خلالو قضرو يتعرفو على وجوه الأشخاص، البوليس لي عرفوهم ومشاو قصدينهم نيشان بارح الخميس وشدوهم فوحد الحي بمدينة العيون واحد بواحد.
وهذ الربعة الأشخاص الصغير فيهم عندو 19 والكبير فيهم عندو 30 عام، وتخريات بينا بلي فيهم شي وحدين فايت ليهم مدوزين الحبس.
حاليا هذ الربعة ديال الأشخاص لي سخن عليهم راسهم، راهم فبحث لي كتشرف عليه النيابة العامة المختصة، باش يزيد يتعمق البحث أكثر ويتعرف علاش صورو الفيديوا بالضبط ؟وشنو هي الأسباب لي خلاتهم يصوروه؟ وعلاش صوروه؟ وفين صوروه؟ ومنين جابو السيوفة؟ وديالمن؟…
