نخب الصحراء – خبار البوليس بالدريجة
البارح الثلاث لبيجي ديال الداخلة، قرقبو على راجل ومرة متورطين فبيع الحشيش والماحية ولي هوما فالأصل أفارقة.
بوليس الداخلة شدو هذ الافارقة البارح قيطي وفيديهم الماحية لي كانو ماشين بيها يبيعوها، ومن بعد عملية التفتيش التي داروها لبيجي فدار لي ساكنين فيها واللي كاينة بحي المسيرة بمدينة الداخلة، لقاو عندهم بيطاكة ديال الماحية وربعة لبلايك ديال الحشيش مسطرين ومقادين.
ومع تعميق البحث معاهم لقاو بلي السيدة عندها معمل تقليدي ديال تقطير الماحية فوحد الدار لي كتواجد فنفس الحي، هذ الدار لي شدو فيها بزاف ديال الباطيك و35 لتر ديال الماحية وزيد عليهم 780 لتر ديال المواد الأولية المخمرة لي كانو مخمرينها فوسط برامل. وزيد عليهم حتى واحد البركة ديال الفلوس لقاوها عندهم وللي شكو فيها جايا من بيع الماحية والحشيش.
المصادر الأمنية گالت بلي هد جوج الافارقة راهم حاليا محطوطين تحت الحراسة النظرية فاطار البحث لي كتشرف عليه النيابة العامة، وهدشي باش يزيدو يعرفو كولشي على هد النشاط الاجرامي واشنو غيديرو مع كل واحد فيهم وحتى الناس لي عندهم علاقة بيهم ولي داخلين معاهم فهد التبزنيزة ديال الحشيش والماحية.
عذراً التعليقات مغلقة