نخب الصحراء – العيون
فوحد الواقعة لي غريبة بزاف ولي كتعتبر وحدة من الجوج يا هدشي “سيبة” يا “تطاول وحگرة”، فوحد الزنقة لي كتواجد خلف مؤسسة التكوين المهني وبالضبط بالقرب من ثانوية محمد الخامس. هد الزنقة لي كانت ممر للعديد من الناس خصوصا الناس لي ساكنين فالاحياء السفلية وايضا التلاميذ والمتدربين ديال المعهد، اليوم هد الزنقة ولات ممر مغلق بسبب هذ “النافذ” لي ومن بعد ما بنا الفيلا ديالو ودار قدامها النخل ناض وسد الزنقة بالبريك باش يستفرد بالمساحة لي گدام الفيلا ديالو واللي اصلا هي ملك عمومي للدولة.
هاد العبث اللي تشكاو منو بزاف ديال المواطنين، وخصوصاً الطلبة والتلاميذ اللي ولاو مضطرين يدورو مسافات طويلة باش يوصلو لمؤسساتهم التعليمية، سبابو هاد الحيط غير القانوني اللي تسدات بيه زنقة كانت متنفس وممر يومي للناس.
اليوم السؤال موجه لرئيس المجلس الجماعي للعيون، السيد حمدي ولد الرشيد: واش فخبارك بهاد السيبة اللي واقعة وراء معهد التكوين المهني؟ وبأي حق كيقدر شي واحد يبني حيط من راسو ويسد طريق عمومية على المواطنين؟ واش الهدف هو يسيطر على المساحة اللي قدام الفيلا ديالو؟ ولا بغا يحرم الناس من حقهم فاستعمال ممر عمومي؟ وشكون عطاه الرخصة باش يدير هاد الشي؟ وإذا ما كانتش عندو رخصة، علاش ما تدخل حتى واحد؟
بحال هاد التصرفات اللي كيديرو بعض الناس اللي كيحسبو راسهم فوق القانون، راها كتمس فمصداقية المؤسسات، وكتخلي المواطن يفقد الثقة فالجهات اللي من المفروض تحمي الملك العمومي وتسهر على احترام القانون. اليوم خاص تدخل عاجل باش يتحيد هاد العبث، حيث إلا بقى الصمت على هاد الشي، اليوم تسدات زنقة… وغدا يمكن يتسد شارع كامل.
عذراً التعليقات مغلقة