نخب الصحراء – بالدريجة
فمفارقة شبيهة بالكوميديا وبالضبط فقاعة الاجتماعات ديال جماعة الجديرية، والبارح الاثنين 2 فبراير 2026، تدار واحد الاجتماع اللي نگدو نسموه : دورة “المهرجان هو اللول وليبقى من بعد ”وهدشي فوسط حضور الرئيس والقايد والأعضاء والموظفين، وحتى شوية الصحافة … غير العريان ما كانش لابس، حيث مازال ما جا دورو.
مهم المجلس فتح الجلسة وتأكد من النصاب، ومن بعد دخل مباشرة فجدول الأعمال اللي باين من العناوين ديالو أن البوصلة كانت مضبوطة على اتجاه واحد واللي هى “مهرجان الجديرية الثقافي السنوي”، الطريق؟ واضحة وبلا دوران : دعم من الجماعة ودعم من مؤسسة وملتمس لوزير الداخلية، وملتمس لوزير الثقافة … وكلها ولي سخاه الله المهم المهرجان المهرجان المهرجان…
طبعا، دازت نقاط بحال تعديل الميزانية، حصر الفائض، الشاحنات الصهريجية مع السمارة (باش ما يعطشوش الناس)، ولكن هادو كانو غير “تسخينات” قبل الماتش الرئيسي واللي هي عوتاني المهرجان.
حتى فجدول الأعمال، المهرجان تكرر جوج مرات، باش اللي ما فهِمش من الأولى يفهم من الثانية، واللي نْعس يفِيق وهي غادية… مهم المهرجان 😅.
الفكرة بسيطة، البنية التحتية..تصبر، الخدمات.. الله كريم، التنمية.. من بعد … ولكن المهرجان خاصو يكون حاضر، وممول، ومُحتفى به، ومرفوع للوزارات حتى لأخر درجة.
الجميل فهدشي هو خطاب المرافق : التعريف بالمؤهلات السياحية، الثقافية، الفلاحية، حماية الرموز الدينية، وتحقيق المصالحة التاريخية … وهدشي كامل غير باش يدار هد المهرجان وتدعم مؤسسة المهرجان، واللي فالمقال جاي غدي نگواو ليكم ديالمن هد المؤسسة لي ناوية دير هد المهرجان…المهم من ورا هذ الخطاب هو الإقناع بالمهرجان.
وفي الأخير وكيف معروف على گاع مجالس الجماعات بالصحراء ، صادَق المجلس على جميع النقاط وبالإجماااااااااع ، وبقى السؤال مسكين معلق من رجليه .. واش الجديرية محتاجة مهرجان؟ ولا محتاجة قبل منو لكسوة للعريان ؟ حيت كما كيقول المثل الشعبي المغربي واللي كان خصو يكون شعار الدورة اصلا “اشخصك العريان؟ قالو ليه : خصني مهرجان امولاي”.
